JUST ME AND ME AGAIN

Monday, November 15, 2010

REMPIT.





RETRO
     Dulu eden adolah perempit tegar.Eden memulokan kerjayo sebagai perempit semonjak dibangku sekolah lae.Maso tu darah tongah paneh.Pantang ado perlumbaan haram eden akan sortai.Moto tak kiro apo.Semuo buleh.Honda cup 70cc lampu bulat abah eden pun eden sosah,janji ado taya ngan enjin.Monang kalah belakang kiro.Selalu eh kalah lahhh..Ha ha haaaa...Mengketedarah asap memanjang..Balik umah eden mengketedarah penampa pulak....
     
     Abih sekolah,eden nolong omak eden motong gotah.Dapek lah sikit belanjo rokok.Aktiviti eden samo gak macam dulu,merompit bilo ado maso terluang.Bezo eh,eden dah buleh tido meluho...Mengketedarah penampa abah eden pun dah kurang.Maklom lah dah bujang.Cumo bebelan omak eden pulak yang botambah...Eden buek2 pokak pun,tedonga gak.Jadi eden buek2 la donga.Niat dihati memang nak berambuih yo dari umah,tapi ngonang an modal tak berapo nak cukup,soba yo lah.


     Dapek kumpo modal sikit,eden sambak yamaha RX100 sebijik.Banggo bona raso eh maso tu.Sekarang ni kalo ekau bawak RX100,maun kono pulau an..Awek jangan arap lah,mandang sebolah mato pun tak hingin...Orang bawak poi motong yo jam ni.Tu pun susah nak jumpo.Kalau ado pun dah macam bangkai benyawo rupo eh.Eden upgrade lobih kurang,boleh lah layan GP100.GP125 usah arap la,Mengketedarah asap den lae.3 taun eden pakai RX neh.Banyak pengalaman pait dari manih.Menyungkam ateh jalan yo ado dalam 6 kali.Belumbo dongan kudo putih trapik tu pekaro biaso yo.Trapik pakai CBR250 lamo,kek jalan luruih boleh lah.Main selekoh kang,makan asap RX eden yo lah.Abih kuek pun,kalau eden tak leh poi,eden lari dalam kobun gotah.Tak terikut kek kudo putih tu.Maun kang dio tesangkut kek aka gotah.Kalau dah tegolek,jawap eh tido kek situ yo lah.Tak terangkek kek trapik tu sesorang.Ronti an lah eden nak nolong.Sapo suruh ekau ikut,


     Tapi satu yo den puji mat2 rempit zaman dulu.Bilo kito orang belumbo haram,tiado pertaruhan yang dibuek.Baik duit maupun pompuan.Paling kuek pun,sapo kalah kono belanjo makan.Kami mat2 rompit maso tu tak kaki pompuan.Bohsia2 ni tiado dalam kamus mat2 rompit maso tu.Tu sobab maso eden dulu tak do kes buang2 bayi kek dopan semojid neh.Kami menten teruna sampai kawin.hahahaaa...Ni jam usah cerito lah.Ado rompit adolah bohsia.Lopeh tu adolah budak umo setongah ari nangih dalam tong sampah...Apo nak jadi pun eden tak tau.Sesapo yang raso tebaka apo yang eden tulih ni,nasib la.Kalau ekau tak buek tak kan ekau nak marah....Jadi ekau pepikir lah sikit.Sok2 kalau ado rezki,ado jodoh,kito nikah la pulak.Ado rezki lae,dapek lak anak.Sorang,duo,tigo,ompek...Kok bako baik dapek 9.Apo lak ekau raso nanti bilo ekau dah tuo,anak daro ekau mengeko mat rempit siang malam.Balik umah porut lak dah buncit.Maso tu ekau amik batang ghembeh(cangkul)ekau gudam kepalo ekau sendiri.Tak do guno eh ekau nak marah2 kek anak daro ekau tu.Nasik dah jadi bubur maso zaman ekau mudo2 dulu lae.....


     Akhir kato den ucapkan tahniah pado mat2 rompit yang menjago tingkah laku ketiko merompit.Merompit lah pueh2.Kawin sok pencen.Eden pun ponah merompit,dan eden tau macam mano nikmat eh maso merompit neh.